කුජීතව සිටින චම්පික වෙනුවෙන් ගොඩනගන රතන හිමිගේ අළුත් රැල්ල

කුජීතව සිටින චම්පික වෙනුවෙන් ගොඩනගන රතන හිමිගේ අළුත් රැල්ල

-රතන හිමිගේ අළුත් "බලවේගය" චම්පික උදෙසායි.
-ලසන්ත වික්‍රමසිංහ

 රතන හිමියන් විසින් පසුගිය ආණ්ඩුවෙන් ඉවත් වීමට දින කිහිපයකට පෙර අපි සම්මුඛ සාකච්ඡාවක් සඳහා එහිමියන් මුණගැසුනෙමු. එවිට ඒ හිමියන් ඉමහත් සාඩම්බරයෙන් අප සමඟ පවසා සිටියේ අපට එක රැයෙන් බලවේගයක් ගොඩ නැංවිය හැකි බවයි. එහිදී එහිමියන් උදාහරණයකට ගෙන පෙන්වූයේ සෝම හිමි අපවත් වීමත් සමඟ හෙළ උරුමය විසින් බිහි කළ දේශපාලන බලවේගයයි.
අහෝ රතන හිමියන් බලවේග යන්න ඉතා පටු ලෙස අර්ථකතනය කරන අයුරු! බලවේග සහ රැළි එහිමියන්ට මාරු වී ඇත. එහිමියන් හදන්න දායක වී ඇත්තේ රැළි මිස බලවේග නොවේ. බලවේග එක රැයෙන් සෑදිය නොහැක. ඒ සඳහා කිහිප දෙනෙකු ජීවිත පරිත්‍යාගයෙන් කටයුතු කළ යුතුය. ඒ සඳහා හොඳම උදාහරණය අනගාරික ධර්මපාලතුමා බව අවිවාදිතව පිළිගත හැකිය. රතන හිමියන් බලවේග යයි කියන්නේ බලවේගවලට නොව. රැළි වලටය. කුමක් හෝ රැල්ළක් මවාගෙන ඒ රැළි මත නැගී රැල්ල සමඟ ඉහළ යාමින් දේශපාලනය කිරීම එහිමියන්ගේත්, චම්පිකගේත් දේශපාලනයේ දැකිය හැකි ප්‍රධානම ලක්ෂණයයි. 

සෝම හිමියන්ගේ අපවත් වීමත් සමඟ සමාජය තුළ ඇති වූ කම්පාවෙන් දේශපාලන රැල්ලක් තනා ගෙන පාර්ලිමේන්තුවට පැන ගන්නට මොවුන්ට හැකි විය. ඉන් පසුව හලාල් විරෝධී රැල්ලට හෙළ උරුමය නොමදව දායකත්වයක් දුනි. ඇතැම් භික්ෂුවක් හෙළ උරුමයේ මධ්‍යම කාරක සභාවෙන් උපායශීලීව ඉවත් කොට බොදු බල සේනා සංවිධානයට බඳවන්නේ ඒ අරමුණෙනි. ඉන් පසු යහපාලන රැල්ලේ නැගී යළිත් වතාවක් පාර්ලිමේන්තු පැන ගත්තෝය. 

රතන හිමි දැන් බොරුවට ස්වාධීන විය. බොරුවට ස්වාධීන වී මේ රජය ගෙන යන ව්‍යවස්ථා ජඩකම ඇතුළු දේශද්‍රෝහී ක්‍රියාමාර්ග විවේචනය කළේය. එහිමියන්ට පාර්ලිමේන්තුව තුළ බොරුවට ස්වාධීන විය හැකිය. නමුත් මේ රටට එරෙහිව සිදුකළ දේශද්‍රෝහී කුමන්ත්‍රණවල පාපයෙන් නම් ස්වාධීන විය නොහැකිය.
මේ විරුද්ධවීම අළුත් තීරණ නොවේ. මේවා යහපාලන කුමන්ත්‍රණයේම අංගයන්ය. මේ ආණ්ඩුව රට බෙදන බව රතන හිමියන් දැන සිටියේය. එය තමා ඇතුළු පිරිසට උන් වහන්සේ බලවේග නමින් හදුන්වන තාවකාලික රැල්ළක් සාදා යළි ඉහළට ඒමට අවස්ථාවක් බවද අවස්ථාවාදී එහිමියෝ දැන සිටියහ. ඒ බව පවසන්නේ අප නොව, උන් වහන්සේමය. 2014 අගදී "ඕගොල්ලෝ රට බෙදන්න අපි විරුද්ධ වන්නම්" යයි පවසා ඇත්තේ අද බොරුවට ස්වාධීන වූ රතන හිමිමය.

ජාතික රූපවාහිනිය ඔස්සේ ප්‍රචාය කළ රාජිතගේ දුරකථන සංවාදය කූඨ විද්‍යූත් ලේඛනයක් නොවන බව ඒ සඳහා මෙතක් නඩු නොපැවරීමෙන් තව දුරටත් තහවුරු කර ඇත. රාජිතගෙන් හෝ රතන හිමිගෙන් හෝ මේ සඳහා පැමිණිල්ලක්වත් නැත.
චම්පිකලාට ජාතික බලවේගයේ ප්‍රමුඛත්වය ගැනීමේ නොතිත් වුවමනාවක් විය. නමුත් ඒ ප්‍රමුඛත්වය කිසිදා ලබාගත හැකිවූයේ නැත. දේශපාලන තලයේ ඒ ජනප්‍රියතාව හිමිව තිබිනේ විමල් වීරවංශ හටය. යහපාලනය හරහා රට බෙදන විට එම ජාතිකවාදී යෂ්ඨිය අතට ගැනීම චම්පිකගේ සහ රතන හිමිගේ සිහිනය විය. චම්පික සහ රතන හිමි අතර පිටට පෙන්වන ආකාරයේ විරසකයක් නැත. රතන හිමි හෙළ උරුමයෙන් මේ අවස්ථාවේ ඉවත්වන්නේ උපායශීලීවය. ඒ මඟින් රතන හිමි හා චම්පික බලාපොරොත්තු වන්නේ රතන හිමි කෙරෙහි කිසියම් විශ්වාසයක් ගෞරවයක් ජනතාව තුළ රදවා ගැනීමයි. 

රතන හිමියන් මුල්වී රජය ගැන කළකිරුණු කොටස එකට ඊනියා බලවේගයක නාමයෙන් එකට එක්කාසු කිරීමටය දැන් සැරසෙන්නේ. විශේෂයෙන් පක්ෂ දේශපාලනය ගැන කළ කිරුණු කොටස් මෙන්ම රට ගැන සැබෑ හැඟීමක් ඇති නමුත් දේශපාලන නොදරුවන්ද මේ රැල්ල සමඟ එක්කර ගැනීම එහිමියන්ට කජ්ජක් නොවේ. එහිමියන් ඒ කාර්යයෙහි ඉතා දක්ෂයකි. 

මේ උත්සාහය සඳහා අවශ්‍ය වන අනෙකුත් සාධකයන් මීට පෙර සිටම නිර්මාණය කෙරෙමින් පැවතුණි. ඒ සඳහා වෘත්තිකයන් පිරිසක් ගොඩ නගා ගැනීම සඳහා එට්කා විරෝධය අවස්ථාවක් කර ගැනීමට ප්‍රබල උත්සාහයක් දැරීය. නමුත් එම උත්සාය ව්‍යවර්ත වී ගියේය. (දැන් වෘත්තිකයින්ගේ ජාතික පෙරමුණ නමින් වෛද්‍ය අනුරුද්ධ පාදෙණිය මහතාගේ සභාපතීත්වයෙන් යුතුව පුළුල් වෘත්තිකයින්ගේ එකමුතුවක් ගොඩ නැගී අවංකව විරෝධය දැක්වීමට පෙරට පැමිණ ඇත.)
තවත් පෙරමුණක් විල්පත්තු ප්‍රශ්නය හරහා බිහි කරගෙන ඇත. මින් කියවෙන්නේ මේවාට සහභාගීවන සෑම දෙනාම එහි දැනුවත් කොටස් කරුවන් බව නොවේ. චම්පිකලාගේ උපාය නම් මෙම විරෝධතාවයන් තුළ තමන්ට හිතවත් කණ්ඩායමක් වෙත නායකත්වය තබා ගන්නට කටයුතු කිරීමයි. මෙය ජවිපෙට වඩා සුක්ෂම ලෙස කරන්නේ චම්පිකලාගේ කණ්ඩායම විසිනුයි. ජවිපෙට අයත් සංවිධානවලට ජවිපෙට අයත් බව සඟවාගත නොහැක. නමුත් චම්පිකලාගෙ සංවිධාන විසින් පොදුවේ සියළු දේශපාලන පක්ෂ විවේචනය කිරීම මඟින් තම සංවිධානය හුදෙක් රටට හිතැති සංවිධානයක් බව මවා පායි.

මේ අතර අප නොදන්නා තව තව පෙරමුණු තිබිය හැකිය. මේ සියල්ල එකතු පහදු කරගෙන රතන හිමි විසින් අලුත් අපක්ෂපාතී ස්වාධීන දේශප්‍රේමී යහපාලනලෝලී පරිසරලෝලී රැල්ලක් නිර්මාණය කරනු ඇත. චම්පික මේ රැල්ල සමඟ දැනට එක් නොවේ. චම්පික වෙනම මේ රැල්ල හා සමාන්තර අදහස් ඔස්සේ ජාතික හෙළ උරුමය සමඟ සිය දේශපාලනය ත්‍රිවුර කරනු ඇත.

ඉන් පසු මේ රැල්ල විසින් දකින සිහින යථාර්තයක් වීමට නම් එය දේශපාලන රැල්ලක් බවට පරිවර්තනය කර ගත යුතුය. අන්න! චම්පික සහ රතන හිමිගේ රැල්ල යළි එක්වන අවස්ථාව එළඹෙනු ඇත. චම්පික සහ තමන් වහන්සේ අතර බරපතළ විරසකයක් නැතැයි රතන හිමියන් මාධ්‍ය හමුවේ පවසන්නේ ඒ ඉඩ ඉදිරියට ඉතිරිකරගත යුතු බව උන් වහන්සේ අන් කාටත් වඩා දන්නා බැවිනි. දැන් චම්පිකගේ දේශපාලන අනාගතය උදෙසා ක්‍රියාත්මක වන මේ අළුත් රැල්ලට රැවටෙන්නේ කවුදැයි අපි බලා සිටිමු.

ලසන්ත වික්‍රමසිංහ
යුතුකම සංවාද කවය