‘ශ්‍රී ලංකා ආරක්‍ෂක හමුදාවන් ‘අතුරුදහන් කරවීම’ යන යුද අපරාධ චෝදනාව යටතේ දඩයම් කිරීමට අවශ්‍ය නීති දෙකක් මේ වන විට සාදා ඇති වත්මන් ආණ්ඩුව හෙට (20) දිනයේ ‘සාපරාධී කාරණාවලදී අන්‍යෝන්‍ය සහයෝගීතාව දැක්වීම (සංශෝධන) පනත් කෙටුම්පත නමින් තවත් දඩයම් පනතක් සම්මත කර ගැනීමට සූදානම් වෙනවා. රටට සාමය දිනා දුන් රණවිරුවන් කූඨ හා සූක්‍ෂ්ම ලෙස ‘අතුරුදහන් කරවීම‘ යන යුද අපරාධ චෝදනාවට ගොදුරු කිරීමට නීති සම්මත කිරීමට අත එසවූ පාර්ලිමේන්තු මන්ත්‍රීවරුන්ට ජනතාව අද ‘වැහි නැති හෙණ’ ඉල්ලනවා. එහෙයින් හෙට දිනයේදීවත් මෙම අහස පොළොව නුහුලන අපරාධයට දායක නොවන ලෙස සියලු පාර්ලිමේන්තු මන්ත්‍රීවරුන්ගෙන් ඉල්ලා සිටිනවා’ යනුවෙන් අද (19) පිටකෝට්ටේ පිහිටි ජාතික නිදහස් පෙරමුණේ ප්රධාන කාර්යාලයේ දී පැවැති මාධ්‍ය හමුවක දී එම පක්‍ෂයේ ජාතික සංවිධායක ජයන්ත සමරවීර මහතා පැවසුවේය.
එහිදී වැඩිදුරටත් අදහස් දැක් වූ ඒ මහතා මෙසේ ද සඳහන් කළේය.
“ශ්‍රී ලංකා පාර්ලිමේන්තුවේ තවත් අපකිර්තිමත් දිනයක් බවට හෙට දිනය පත් කිරීමට යහපාලන ආණ්ඩුව සූදානම්ව සිටිනවා. හෙට රණවිරු දඩයමට අදාළ තුන්වන පනත් කෙටුම්පත සම්මත කර ගැනීමට නියමිතයි. රණවිරුවන් ‘දඩයම් කිරීම’ අද වන මේ ආණ්ඩුවේ ප්‍රධානතම කර්මාන්තය වී තිබෙනවා. වසර තුනක් තිස්සේ රට තුළ කිසිදු නව කර්මාන්තයක් ආරම්භ කිරීමට නොහැකි වී තිබෙන සිරිසේන – වික්‍රමසිංහ ආණ්ඩුව තමන්ගේ ප්‍රධානතම කර්මාන්තය ලෙස රණවිරු දඩයම පවත්වා ගෙන යනවා. මේ අය මේ කර්මාන්තය පවත්වාගෙන යන්නේ ජිනීවා මානව හිමිකම් කවුන්සිලය, ඇමෙරිකා එක්සත් ජනපදය ඇතුළු බටහිර බලවතුන් හා දෙමළ ඩයස්පෝරාව යන අශූද්ධ හවුලේ පූර්ණ අනුග්‍රහය, අශිර්වාදය ඇතිවයි.
‘අතුරුදහන් වූවන් පිළිබඳ කාර්යාලය’
‘රණවිරු දඩයම් කර්මාන්තය’ මේ ආණ්ඩුව සිදු කරන්නේ ඉතාමත් කුඨ විදියට. රණවිරු දඩයමට අදාළ මුල්ම පනත මේ ආණ්ඩුව 2017 අගෝස්තුවේ දී සම්මත කර ගනු ලැබුවා. අතුරුදහන් වූවන් පිළිබඳ කාර්යාලය පිහිටුවීමේ පනත ලෙසයි එය මෙරට නීති පද්ධතියට එකතු වුණේ. ඒ පනතින් අතුරුදහන්වූවන් පිළිබඳ කාර්යාලයක් පිහිටුවීමට හැකි වූවා. දැන් ඒ කාර්යාලය ක්‍රියාත්මකයි. එහි කොමසාරිස්වරුන් ලෙස කොටි හිතවාදී කතක් වන ජිනීවා මානව හිමිකම් කවුන්සිලයට ගිහින් ශ්‍රී ලංකා හමුදාවට යුද අපරාධ චෝදනා එල්ල කළ නීතිඥ නිමල්කා ප්‍රනාන්දු පත් කර තිබෙනවා. මේ අතුරුදහන්වූවන් පිළිබඳ කාර්යාලය ‘අර්ධ අධිකරණ කොමිසමක්’ ලෙසයි, කටයුතු කරන්නේ. මේ කොමිසමට ලැබෙන පැමිණිලි සඳහා සාක්ෂි පනත අදාළ වෙන්නෙත් නැහැ. ස්කයිප්, ඊ- මේල් හරහා යම් තැනැත්තකු අතුරුදහන් කළ බවට ලැබෙන පැමිණිලි අනුව ඔවුන් චෝදනා ගොනු කරනවා.
මේ කාර්යාලය පිහිටුවීමේ පනත් කෙටුම්පත විවාදයට ගන්නා අවස්ථාවේ දී ජවිපෙ රතු අලි පැටව් කීවා ‘රෝහණ විජේවීර සහෝදරයා ඇතුළු ජවිපෙ අතුරුදහන් වූවන් පිළිබඳවත් මෙවැනි කාර්යාලයක් පිහිටුවීමෙන් පසුව සොයා බලන්න පුළුවන්. ඒ නිසා අපි මේ පනතට අත් දෙකම ඔසවනවා’ කියලා. නමුත් අද මොකද වෙමින් පවතින්නේ. මියගිය කොටි ත්‍රස්තවාදීන්ගේ ඥාතීන් විසින් කරනු ලබන පැමිණිලි පිළිබඳව පමණයි මේ ‘අතුරුදහන් වූවන් පිළිබඳ කාර්යාලය’ ක්‍රියාත්මක තිබෙන්නේ. ඒ අනුව සාක්ෂි පනතත් අදාළ කරගන්නේ නැතිව’ අපේ රණවිරුවන්ට එරෙහිව ලැබෙන පැමිණිලි අනුව චෝදනා ගොනු කිරීම සිදු කර ගෙන යනවා. එදා මේ පනත සම්මත කර ගැනීමට සූදානම් වන විට අපි පෙන්වා දුන්නා මේ හදන්නේ රණවිරුවන්ට එරෙහිව චෝදනා ඉදිරිපත් කරන ‘චෝදනා ෆැක්ටරියක්’ කියලා. දැන් අපේ රණවිරුවන්ට ‘අතුරුදහන් වීම් සිදු කළා‘ කියලා චෝදනා නිර්මාණය කිරීම අපූරුවට නිමල්කා ප්‍රනාන්දු ඇතුළු මේ කාර්යාලයට පත්වීම් ලැබූ කොටි හිතවාදීන් සිදු කරනවා.
‘ජාත්‍යන්තර ප්‍රඥප්තිය බලාත්මක කිරීම’
මංගල පින්සිරි සමරවීර ජිනීවාවලදී ‘බලහත්කාරයෙන් අතුරුදහන් කිරීම්වලින් සියලු තැනැත්තන් ආරක්‍ෂා කිරීමේ ජාත්‍යන්තර ප්‍රඥප්තිය’ට අත්සන් කරනු ලැබුවා. ලෝකයේ රටවල් 53ක් පමණයි මේ ප්‍රඥප්තිය පිළිගෙන ඇත්තේ. ඇමෙරිකා එක්සත් ජනපදය, බි්‍රතාන්‍යය, රුසියාව, චීනය පවා ඊට අත්සන් කර නැහැ. මේ ප්‍රඥප්තියට අත්සන් කළේ ද අපේ රණවිරුවන්ට එරෙහි දොවන දඩයම් පනත පාර්ලිමේන්තුවේ සම්මත කර ගැනීමට උවමනා නිසයි. 2018 මාර්තු 07 වැනිදා මේ ජාත්‍යන්තර ප්‍රඥප්තිය ශ්‍රී ලංකාවේ නීති පද්ධතියට ඇතුළත් කරමින් ‘බලහත්කාරයෙන් අතුරුදහන් කිරීම්වලින් සියලු තැනැත්තන් ආරක්‍ෂා කිරීමේ ප්‍රඥප්තිය පනත’ පාර්ලිමේන්තුවේ සම්මත කළා. මේ තමයි දෙවන රණවිරු දඩයම් පනත. එමගින් ඉහත කී අතුරුදහන්වූවන් පිළිබඳ කාර්යාලය මගින් අතුරුදහන් කිරීම් පිළිබඳව චෝදනා ගොනුකර ඇති රණවිරුවන්ට එරෙහිව නඩු ඇසිය හැකි විශේෂ අධිකරණයක් මෙරට පිහිටුවීමට නියමිතයි. ඒ වගේම ඉහත ප්‍රඥප්තියට අත්සන් කර ඇති රටක අධිකරණයක අපේ රණවිරුවන්ට එරෙහිව නඩු පැවරුවොත්, අදාළ අධිකරණයට පුළුවන් සැකකරුවන් පිටුවහල් කරන ලෙස ශ්‍රී ලංකා රජයෙන් ඉල්ලා සිටින්න.
දැන් බලන්න ‘රණවිරු දඩයම කොතරම් කූඨ හා සූක්‍ෂ්ම ලෙස මේ ආණ්ඩුව සිදු කරනවාද?’ කියා. ‘අතුරුදහන් කිරීම’ කියන්නේ ‘යුද අපරාධ’ ගනයෙහි ලා සැලකෙන වරදක්. දැනට මේ ආණ්ඩුව සම්මත කර ඇති රණවිරු දඩයම් පනත් දෙක මගින් අපේ රණවිරුවන්ට එරෙහිව ‘අතුරුදහන් කිරීම’ කියන යුද අපරාධ චෝදනාව යටතේ මෙරට විශේෂ අධිකරණයකත් ‘අතුරුදහන් කිරීම් වැළෑක්වීමේ ජාත්‍යන්තර ප්‍රඥප්තියට’ අත්සන් කළ රටක අධිකරණයකත් නඩු අහන්න පුළුවන්. එහෙනම් අපේ රණවිරුවන්ට එරෙහිව යුද අපාරධ පිළිබඳ නඩු අහන්න අමුතුවෙන් අධිකරණ හදන්න ඕනෙ නැහැ.
’තුන්වන දඩයම් පනත’
ඒත් තවත් පොඩි අඩුවක් තිබෙනවා. ඉහත කී ජාත්‍යන්තර ප්‍රඥප්තියට අත්සන් කර නැති ඇමෙරිකා එක්සත් ජනපදය, බි්‍රතාන්‍යය ඇතුළු රටක අධිකරණයක අපේ රණවිරුවකුට එරෙහිව නඩු පැවරීමට පුළුවන් වුවත්, ඔහුව ඒ රටට ගෙන්වා ගැනීමට බැහැ. එනම් ඒ රටට පිටුවහල් කරන ලෙස නියෝග කරන්න බැහැ. ඒකට තමයි හෙට දිනයේදී ‘සාපරාධි කාරණාවලදී අන්‍යෝන්‍ය සහයෝගීතාව දැක්වීම (සංශෝධන) පනත් කෙටුම්පත සම්මත කර ගන්නේ. දැනට පවතින ‘සාපරාධි කාරණාවලදී අන්‍යෝන්‍ය සහයෝගීතාව දැක්වීම පිළිබඳ පනතට සංශෝධන 22ක් ගෙනවිත්, ඕනෑම රටක අධිකරණයකට අපේ රණවිරුවන්ට එරෙහිව අතුරුදහන් කිරීම නැමැති සාපරාධි වරද කළ බවට චෝදනා කරලා ඔවුන් ඒ රටට පිටුවහල් කරවා ගැනීමට අවශ්‍ය නීතිමය ඉඩකඩ හදලා දීමයි හෙට සිදුවන්නේ.
කෙසේනමුත් 2015 අගෝස්තුවේ පිහිටුවනු ලැබූ පාර්ලිමේන්තුව විසින් අද වන විට රණවිරු දඩයමට අදාළ භයානක පනත් දෙකක්’ නීති දෙකක්, සම්මත කරලා ඉවරයි. හෙට දිනයේදී එවැනිම පනතක් සම්මත කිරීමට නියමිතයි. මෙහෙම පාර්ලිමේන්තුවක් තියෙන්නේ ඕනෙ ද? ඒ නිසා ‘මේ පාර්ලිමේන්තුව ගිනි තියන්න ඕනෙ’ කියලා ජනතාව කිව්වොත් ඒක නිවැරදි තීරණයක්. ඒ වගේම අපි පාර්ලිමේන්තුවේ සියලු මන්ත්‍රීවරුන්ගෙන් ඉල්ලනවා ‘ඔබ ඉතිහාසයේ විත්ති කූඩුවට නගින්න ලෑස්ති වෙන්න එපා! – ජනතාවගේ වෛරයට පාත්‍ර වන අය බවට පත් වෙන්න එපා’ කියලා. මේ පනතටත් අත ඔසවන මන්ත්‍රීවරුන්ට මේ රටේ ජනතාව වැහි නැති හෙණ ඉල්ලාවි. ඒ නිසා ඔබලා වැහි නැති හෙණ ඉල්ලන මන්ත්‍රීවරු බවට පත් වෙන්න එපා!’ මේ පනත් කෙටුම්පත විවාදයට නොගෙන ඉල්ලා අස්කර ගන්න කියන බලපෑම අපි කරනවා. ඒ වගේම අපි ජාතියට අවධාරණය කරනවා ‘මේ යහපාලන ආණ්ඩුව මේ සැරසෙමින් ඉන්නේ ඉරහඳ යට තිබෙන කවර හෝ නීති ගෙනල්ලා ඔබට ජිවීතය දිනා දීපු රණවිරුවන්ගෙන් පලිගන්න. ඊට එරෙහිව පියවර ගන්න එඩිතර වෙන්න, පෙරට එන්න’ කියා.”
මෙම මාධ්‍ය හමුවට ජානිපෙ කඩුවෙල මහා නගර සභා මන්ත්රී වරුවන කේ.ඩී. අජිත් කුමාර, ශෂි පෙරේරා යන මහත්වරු ද එක්ව සිටියහ.
අනුරුද්ධ බණ්ඩාර රණවාරණ
මාධ්‍ය ලේකම්
ජාතික නිදහස් පෙරමුණ
මාධ්‍ය ලේකම්
ජාතික නිදහස් පෙරමුණ
![ඇමතිවරයෙක් මත්ද්රව්ය ජාවාරමට සහාය දෙන බව කියූ පුවත ගලවන්නැයි නෙත් ගුවන් විදුලියට ෆොන්සේකාගෙන් බලපෑම්…[Video]](http://lankacnews.com/wp-content/uploads/2018/04/fonseka.jpg)
![මංගලගේ මත්ද්රව්ය චෝදනාවෙන් සිංහ සමාජය ඇවිලේ.. අස්වාභාවික ලිංගික ක‍්‍රියා, මුල්‍ය අපරාධ ගැන මාධ්‍ය හමුවක් කැදවා හෙලි කරයි..[Video]](http://lankacnews.com/wp-content/uploads/2018/07/54646.jpg)
